Эвийн хорвоог түшилцэн

Ижий минь нутагтаа бий

Эргэх замын үзүүр тоссон

Эсгий цагаан гэртээ бий

Гэгэл цайлган сэтгэлд нь

Насны хир угаагдаж

Эгэл уужим хайранд нь

Ухааны сэв ариусч

Буман ачлалд ивээсэн

Буянтны дээд ижий минь

Холын холоос таныгаа гэж

Хоногийн цаанаас яараад байна

Эвийн хорвоог түшилцсэн

Эх нутаг надад бий

Ирнэ л гэж хүлээгээд

Ижийтэй минь хамт бий

Гэрлийн олзтой хорвоод

Хүний хувьтай ирэхдээ

Гэр шигээ дотно нутагтаа

Хүүгийн азаар өөриймсэж

Насны содон үеэ

Нутагтаа даамай өгчхөөд

Навч цэцгийн шүтэл шиг

Ургийн холбоо барьсан

Эх нутгаа хүү нь

Ижий шигээ л санаад байна

Ижлээ дутаах амь шиг

Элгээ сүжрээн санаад байна

Насны барилдлага шүтэлцсэн

Ургийн нандин холбоонд

Нар, сар, дэлхий шиг

Удмын бат ерөөлд

Эвийн хорвоог түшилцсэн

Ертөнцийн гурван амины

Эсийн тэнцвэр атгалцсан

Нэг нь би өөрөө байна

Алив нэг нь дутваас

Амьдралын хэм тэгшрэхгүй ээ

Хоёр нь дутсан газарт

Хорвоогийн жаргал тэнцрэхгүй ээ

Эвийн хорвоог түшилцсэн

Эх нутаг надад бий

Эргэх замын үзүүр тосон

Ижий минь нутагтаа хүлээж бий

1997 он Лейпциг, Герман