Цэнхэр тэнгэрийн хаяа газарт нийлэх тэртээ

Захгүй шаргал талын нарийн зөргөөр хөлхөж

Сэрүүн сайхан хангайдаа сэтгэл сэргэж явсан

Сэргэлэн бага насаа дуулж явна би

Хонин сүрэг налайх уужим талын бэлчээрт

Хоолой шалгах дууны уян зөөлөн айзамд

Хотлоор цэнгэх баярын уярал бүрдэх дуулианд

Хонгор бага насаа дуулж явна би

Хурдан морины нуруунд гийнгоо аялан хурдалж

Хуйвтай шилбүүр барин хурга ишгээ буруулж

Хүйтэн голын уснаа өнжин умбаж тоглосон

Хөгжөөнт бага насаа дуулж явна би

Шиврээ зөөлөн борооноор хувцсаа тайчин гүйлдэж

Шинэхэн татсан солонгыг гартаа барихаар хөөцөлдөж

Цэгээн талын цэцгүүд өнгө алаглах зунаар

Цэнхэр ямбуу цамцтай дэрвэж явнаа би

Цэнхэр тэнгэрийн хаяа газарт нийлэх тэртээ

Захгүй шаргал талын нарийн зөргөөр хөлхөж

Сэрүүн сайхан хангайдаа сэтгэл сэргэж явсан

Сэргэлэн бага насаа дуулж явнаа би

1969 он   Одесса

(Энэ шүлгэнд хөгжмийн зохиолч Хайдавын Сэргэлэн 1969 онд ая хийсэн)